श्रीगोंदा:नागवडे कुटुंबही भाजपच्या वाटेवर?

राजकारण

shadow

श्रीगोंदा(APLive24):श्रीगोंदा विधानसभा निवडणुकीमध्ये अपक्ष उमेदवारी अर्ज भरलेल्या अनुराधा नागवडे व राजेंद्र नागवडे यांनी शनिवारी आयोजित केलेल्या समर्थकांच्या मेळाव्यात भाजपचे खासदार डॉ. सुजय विखे यांनी अचानक हजेरी लावली. यावरून नागवडे कुटुंब लवकरच भाजपमध्ये प्रवेश करणार असल्याच्या चर्चा सुरू झाल्या आहेत.

शनिवारी (५ ऑक्टोबर) दुपारी ढोकराई येथील प्रगती मंगल कार्यालयात नागवडे गटाच्या कार्यकर्त्यांचा सहविचार मेळावा आयोजित करण्यात आला होता. या मेळाव्याला उपस्थित रहात खासदार विखे यांनी काँग्रेसनेत्या अनुराधा नागवडेंना उमेदवारी मागे घेऊन भाजपत प्रवेश करण्याचे आवाहन केले. खासदार विखे म्हणाले, 'आम्ही अनेकदा दिलेले शब्द पाळू शकलो नाही. मात्र स्व. शिवाजीराव नागवडेंनी राजकारणात नेहमीच शब्द प्रमाण मानला. श्रीगोंद्याच्या राजकारणात नागवडेंचा अनेकांनी स्वार्थासाठी वापर केला. विखे कुटुंबाच्या शब्दावर विश्वास ठेवून निर्णय घ्या. तालुक्यात व्यक्तीला नव्हे, तर भाजप पक्षाला सहकार्य करा. नागवडेंना श्रीगोंद्याच्या सत्तास्थानी बसविण्याची जबाबदारी माझी,' असे आश्वासन खासदार सुजय विखे यांनी दिले.

नागवडे कारखान्याचे अध्यक्ष राजेंद्र नागवडे म्हणाले, 'काँग्रेस-राष्ट्रवादीकडे विधानसभेच्या उमेदवारीची मागणी केली होती. माजीमंत्री हर्षवर्धन पाटील आणि खासदार विखे यांच्या मदतीने भाजपकडे देखील उमेदवारीसाठी प्रयत्न केले. मात्र, आजही विखे कुटुंबाने साथ दिल्यास १५ दिवसांत नागवडे कार्यकर्त्यांच्या बळावर आमदार होतील. इथून पुढच्या काळात आमच्याबरोबर जे येतील त्यांना सर्वोतोपरी ताकद देण्याचे काम करू. माजीमंत्री पाचपुतेंशी आमचे कधीच जमले नाही. भविष्यात देखील कधीच जमणार नाही. मात्र, मुख्यमंत्री देवेंद्र फडणवीस, खासदार सुजय विखे यांनी नगरपालिकेसाठी निधी, घोड, कुकडीसह साकळाईचा पाणीप्रश्न मार्गी लावण्यासाठी मदत करण्याचा शब्द द्यावा. त्याचबरोबर उद्याच्या काळात नागवडे कुटुंबातील व्यक्तीला आमदारकी मिळवून देण्याची जबाबदारी विखे यांनी घेतली तर आपण उमेदवारी अर्ज मागे घेऊ अन्यथा पूर्ण ताकदीनिशी विधानसभा निवडणूक करू,' असे प्रतिपादन नागवडे यांनी केले.

या वेळी माजी नगराध्यक्ष मनोहर पोटे, प्रशांत गोरे, रामदास झेंडे, शिवाजी नलावडे, रमेश जाधव, उर्मिला काटे, नितीन वाबळे, रामभाऊ रायकर आदींनी भावना व्यक्त केल्या. जिल्हा परिषदेच्या महिला व बालकल्याण समितीच्या सभापती अनुराधा नागवडे, नगराध्यक्षा शुभांगी पोटे, दीपक नागवडे, बाजार समितीचे सभापती धनसिंग भोयटे, सुरेश लोखंडे, बाळासाहेब नलगे, राजू गोरे, सतीश मखरे, नगरसेवक राजू लोखंडे, संतोष कोथिंबीरे, असिफ इनामदार आदी उपस्थित होते.

 

 

 

जाहिरात

shadow

संबंधित