ఆంధ్రప్రదేశ్‌లో వర్షాల దాడి మరింత తీవ్రంగా ఉండబోతోందని భారత వాతావరణ శాఖ (IMD) Red Alert జారీ చేసింది. సెప్టెంబర్ 1 నుండి 5 వరకు రాష్ట్రవ్యాప్తంగా భారీ నుంచి అత్యంత భారీ వర్షాలు, ఉరుములు–మెరుపులు, బలమైన గాలులు వీస్తాయని అంచనా వేసింది.
ప్రత్యేకంగా ఉత్తర తీర ఆంధ్ర, దక్షిణ తీర ఆంధ్ర, రాయలసీమ ప్రాంతాల ప్రజలు అప్రమత్తంగా ఉండాలని సూచించింది. రాబోయే రోజుల్లో మాన్సూన్ ప్రభావం మరింత పెరగనుందని అధికారులు చెబుతున్నారు.
సెప్టెంబర్ 2, 3 తేదీల్లో తీర ప్రాంతాల్లో వర్షాలు అత్యధికంగా కురిసే అవకాశం ఉంది. కొన్ని ప్రాంతాల్లో 20 సెంటీమీటర్లకు పైగా వర్షపాతం నమోదయ్యే అవకాశం ఉన్నందున తక్కువ ప్రాంతాల్లో నీరు నిలిచిపోవడం, రహదారులు దెబ్బతినడం, విద్యుత్ అంతరాయాలు వంటి సమస్యలు తలెత్తే అవకాశం ఉందని అధికారులు హెచ్చరిస్తున్నారు.
మత్స్యకారులు ఈ సమయంలో సముద్రానికి వెళ్లవద్దని సూచించారు. సముద్రం అలజడి పరిస్థితులు ఏర్పడే అవకాశం ఉన్నందున తీర ప్రాంత గ్రామాల్లోని ప్రజలు అప్రమత్తంగా ఉండాలని హెచ్చరికలు జారీ చేశారు.
గత సంవత్సరం విజయవాడలో భారీ వర్షాలు నగరాన్ని ముంచెత్తిన సంగతి తెలిసిందే. ఒకేరోజులో 29 సెంటీమీటర్ల వర్షం కురవడంతో అనేక ప్రాణనష్టం, ఆస్తినష్టం సంభవించింది. అందుకే ఈసారి ముందస్తు జాగ్రత్తలు తీసుకోవాలని అధికారులు సూచిస్తున్నారు.
ప్రజలు ఇంట్లోనే ఉండి, అవసరం లేని ప్రయాణాలు చేయవద్దని, వాతావరణ విభాగం సూచనలను కచ్చితంగా పాటించాలి అని ప్రభుత్వం విజ్ఞప్తి చేసింది.
